خبر رساں ادارے رائٹرز کے مطابق روس نے امریکی میزائل تجربے پر اپنے رد عمل میں کہا ہےکہ امریکہ نے اس تجربے کے ذریعے ہتھیاروں کی دوڑ میں اضافہ کیا ہے۔
میڈیا رپورٹس کے مطابق پینٹاگون نے پیر کے روز کروز میزائل کے تجربے سے آگاہ کرتے ہوئے بتایا تھا کہ امریکہ نے روایتی ساخت کے کروز میزائل کا تجربہ کیا جس نے 500 کلو میٹر تک پرواز کرکے اپنے ہدف کو کامیابی سے نشانہ بنایا۔
روس کی جانب سے معاہدے کی خلاف ورزی کے الزام پر امریکہ رواں ماہ روس کے ساتھ انٹرمیڈیٹ نیو کلیئر فورسز معاہدے (آئی این ایف) سے دستبردار ہوگیا تھا کیونکہ معاہدے کے تحت امریکہ کے میزائل تجربے پر پابندی عائد تھی۔
روسی نائب وزیر خارجہ نے اپنے ایک بیان میں کہا کہ امریکہ نےیہ اقدام فوجی کشیدگی میں اضافے کے لیے اٹھایا ہے تاہم روس کسی اشتعال انگیزی میں جلدی نہیں کرے گا اور اپنے آپ کو مہنگے ہتھیاروں کی دوڑ میں شامل نہیں کرے گا۔
روسی نائب وزیر خارجہ نے مزید کہاکہ جب تک امریکہ نے تجربہ نہیں کیا تھا روس کا کسی بھی قسم کے نئے میزائلوں کی تعیناتی کا کوئی ارادہ نہیں تھا۔