مغربی لبرل تسلط مزید نہیں چل سکتا، جدید نظریہ بری طرح سے ناکام ہو گیا ہے، اسے ختم کر دینا چاہیے۔ یہ کہنا تھا یورپی ملک ہنگری کے وزیراعظم وکتور اوربان کا، بدھا پسٹ میں ایک کانفرس سے خطاب کرتے ہوئے۔
وکتور اوربان نے اس حوالے سے وقت بھی دیا اور کہا کہ انسانیت کی رواں سال اس جابرانہ نظام سے جان چھوٹ جائے گی۔
کانفرنس میں خطاب کے دوران وزیراعظم اوربان کا کہنا تھا کہ لبرل تسلط نے اپنی بقاء کے لیے ایسے لوگوں کو دنیا پر مسلط کر دیا ہے جو کسی بھی صورت قیادت کے اہل نہیں تھے۔ انہوں نے عالمی لبرل سیاسی رہنماؤں کا موازنہ بیوٹی صنعت کے کرداروں سے کیا اور کہا کہ بہت سے ماڈل عالمی امن کے موضوع پر ان سیاسی رہنماؤں سے زیادہ جانتے ہیں۔
مشرقی یورپی ملک کے اعلیٰ ترین حکومتی اہلکار کا کہنا تھا کہ لبرلیت مکمل نظریاتی کنٹرول چاہتی ہے، جس میں کسی دوسرے کے لیے کوئی جگہ نہیں۔ ریاستیں تشدد اور جبر کا آلہ بنا دی گئی ہیں، ایسے نظریے کو لوگ کیسے قبول کر سکتے ہیں؟ یہ قوتیں انسانیت کی دشمن ہیں اور انہیں ختم ہو جانا چاہیے۔
انہوں نے رواں سال یورپی پارلیمنٹ کے انتخابات کا حوالہ دیتے ہوئے کہا کہ نمایاں طور پر یورپ میں نئی نہیں، پرانی دنیا کے حامی قوت پکڑ رہے ہیں۔ جو اس بات کا اشارہ ہے کہ ان انتخابات کے بعد دنیا سے اس نظریے کا خاتمہ ہو جائے گا۔ ان کا مزید کہنا تھا کہ اگرچہ امریکی سیاست میں مداخلت کرنا انہیں پسند نہیں، لیکن انہیں لگتا ہے کہ اس سال نومبر میں ہونے والے امریکی صدارتی انتخابات میں بھی نام نہاد ترقی پسند لبرل قوت کھو دیں گے اور یہ نظریہ، اس دنیا سے ختم ہو جائے گا۔
وزیراعظم وکتور اوربان کا مزید کہنا تھا کہ “اگر خدا نے چاہا تو رواں سال ہم مغربی تسلط کے اس سیاہ دور کو ختم کر دیں گے۔ مغربی طرز کی ترقی کے عالمی تسلط کے خاتمے کا وقت آگیا ہے، یہ نظریہ اپنی روح کھو چکا ہے، بری طرح سے ناکام ہو گیا ہے، اس نظریے نے دنیا کو تباہ کن عالمی جنگوں، بے امنی اور افراتفری کے سوا کچھ نہیں دیا۔
انہوں نے مستقبل کے نظام و نظریے کے حوالے سے کہا کہ مغربی تسلط پر مبنی لبرل نظام کے بعد آنے والا نظام حقیقی خود مختاری پر مبنی ہو گا جس میں اقوام حقیقی معنوں میں اپنے مفادات کا تحفظ کر سکیں گی، اس میں کسی قوم پر عالمی اجارہ داری یا تسلط نہیں ہو گا۔ ہم خود مختار آزاد دور کا استقبال کرتے ہیں، ہم واپس امن اور تحفظ کی طرف جائیں گے، آئیں دوبارہ امریکہ کو عظیم ملک بنائیں، آئیں دوبارہ یورپ کو عظیم بنائیں۔