اتوار, اکتوبر 25 Live
Shadow

لاشوں کےلیے بیگ ہیں تو کورونا پر سیاست کریں، ڈبلیو ایچ او چیف کا ٹرمپ کو کرارا جواب

کورونا وائرس کے معاملے پر عالمی ادارہ صحت کے سربراہ اور امریکی صدر آمنے سامنے آگئے ۔امریکی صدر ڈونلڈ ٹرمپ نے گزشتہ روز کورونا وائرس سے پیدا صورتحال پر عالمی ادارہ صحت پر شدید تنقید کی تھی اور ادارے کے فنڈز میں کٹوتی کا عندیہ دیا تھا جس پر عالمی ادارہ صحت کے سربراہ ڈاکٹرٹیڈروس ایڈھانم گیبریوس نے ٹرمپ کو کرارا جواب دیتے ہوئے اپنے رد عمل میں ادارے کے مؤقف کا دفاع کیا۔

جنیوا میں نیوز کانفرنس کرتے ہوئے ڈاکٹر ٹیڈروس کا کہنا تھا وائرس کو سیاست زدہ نہ کریں، یہ آپ کے قومی سطح کے اختلافات سے مزید پھیلے گا اور اگر آپ چاہتے ہیں کہ یہ پھیلےاور اگر آپ کے پاس مزید لاشیں رکھنے کے لیے بیگ ہیں تو سیاست کریں اوراگر آپ مزید لاشیں نہیں دیکھنا چاہتے تو وائرس کو سیاست زدہ کرنے سے باز رہیں۔ میرا ایک مختصر پیغام ہےکہ براہ کرم کووڈ سیاست کو قرنطینہ کردیں، آپ کا قومی اتحاد اس خطرناک وائرس کو شکست دینے کے لیے بہت اہم ہوگا۔

ڈاکٹر ٹیڈورس کا کہنا تھا کہ ہم جو کچھ کرسکتے تھے وہ کررہے ہیں۔انہوں نے کہا کہ ہم جانیں بچانے کے لیے کوششیں کررہے ہیں لہٰذا وقت برباد نہیں کرنا چاہتے۔ ڈبلیو ایچ او کسی بھی ایکشن کی تشخیص بعد کام کرتی ہے۔عالمی ادارہ صحت اس وبا سے سبق سیکھنا چاہتا ہے۔

واضح رہےکہ دنیا بھر میں کورونا کے کیسز کی تعداد 15 لاکھ سے زائد ہوگئی ہے اور  88 ہزار سے زائد افراد ہلاک ہوچکے ہیں۔

دوست و احباب کو تجویز کریں

تبصرہ کریں