کورونا ہمارے معاشرے میں ایک اورمستقل وبا کی شکل اختیارکر سکتا ہے، جیسے ایچ آئی وی ختم نہیں ہوا اور ہمیں اس کےساتھ رہنا پڑا۔ ڈائریکٹر ایمرجنسی ڈبلیوایچ او مائیکل ریان نے جینیوا میں ورچوئل پریس کانفرنس کرتے ہوئے کہا کہ انسانی آبادی میں ایک نیا وائرس داخل ہواہے لہٰذا پیش گوئی کرنا مشکل ہےکہ وائرس پر کب تک قابو پایا جا سکتا ہے۔
مائیکل ریان نے مزید کہا کہ پابندیوں میں نرمی سے وبا کی دوسری لہر نہ آنے کی ضمانت نہیں دی جاسکتی، بہت سےممالک چاہیں گےکہ پابندیوں سے باہر آئیں، لیکن ہماری سفارش ہےکہ کسی بھی ملک میں انتباہ اعلیٰ سطح پر ہونا چاہیے۔خیال رہے کہ دنیا بھر میں کورونا وائرس سے اب تک 44 لاکھ 29 ہزار سے زائد افراد متاثر جب کہ 2 لاکھ 98 ہزار سے زیادہ لقمہ اجل بن چکے ہیں۔