سعودی حکام نے حج کی ادائیگی کے لیے کورونا ویکسین لگوانا لازم کر دی ہے۔ سرکاری اعلامیے میں کہا گیا ہے کہ رواں سال حج کی درخواست کے لیے پہلی شرط کورونا کے خلاف ویکسین ہو گی۔
اگرچہ مملکت کی وزارت صحت نے تاحال اس حوالے سے کسی فیصلے سے آگاہ نہیں کیا ہے کہ آیا رواں سال بھی صرف سعودیہ میں موجود مسلمانوں کو حج کی اجازت ہو گی یا دنیا بھر سے مسلمان حج کی سعادت کے لیے سفر کر سکیں گے؟ تاہم ویکسین کی شرط کو واضح کر دیا گیا ہے۔ یاد رہے کہ گزشتہ سال وباء کے باعث صرف سعودیہ میں مقیم 1000 مسلمانوں، جن میں سعودی اور غیر ملکی سب شامل تھے، کو حج کی اجازت دی گئی تھی۔
یاد رہے کہ سعودی حکومت نے بھی ملک میں ویکسین کا آغاز 17 دسمبر 2020 کو کر دیا تھا، سعودی حکومت نے تاحال فائزر، استرازینکا اور موڈرنا کے استعمال کی اجازت دی ہے۔ سعودی مملکت میں تاحال کورونا سے 3 لاکھ 77 ہزار متاثرہ افراد کی نشاندہی ہوئی ہے، جبکہ 6500 ہلاکتیں درج کی گئی ہیں۔