ایرانی وزیر خارجہ محمد جواد ظریف نے برطانیہ کے جھنڈے والے ٹینکر اسٹینا امپیرو کے حوالے سے قانونی امور کو “تیز تر” کرنے کا وعدہ کیا جسے ایران نے لندن کے ساتھ ایک سفارتی تلخی کے دوران گذشتہ ماہ ضبط کرلیا تھا۔
رائٹرز کے مطابق ، جمعرات کے روز ملائیشیا کے سفر کے موقع پر ایرانی وزیرخارجہ جواد ظریف نے کہا کہ ہم اپنے زیر قبضہ برطانوی ٹینکر کے لئے قانونی عمل کو تیز کریں گے جسے ہم نے ان کے بحری جرائم کے ارتکاب کے بعد قبضے میں لے لیا تھا۔ یاد رہے کہ جواد ظریف کا تبصرہ سویڈن شپنگ کمپنی اسٹینا بلک کے سربراہ ایریک ہینل جو قبضے میں لیے گئے بحری جہاز کامالک ہے، سے ملاقات کے ایک ہفتے بعد آیا ہے۔ ہنیل نے تہران سے کہا ہے کہ وہ جہاز اور اس کے عملے کے 23 اراکین کو رہا کردے۔
جولائی کے اوائل میں جہاز کے قبضے کے سلسلے میں کشیدگی کا آغاز اس وقت ہوا جب ایرانی آئل ٹینکر گریس 1 کو اسپین کے جنوبی ساحل سے برطانوی کمانڈوز اور جبرالٹر پولیس نے قبضے میں لیا تھا۔جہاز کے عملے سے یورپی یونین کی پابندیوں کی خلاف ورزی کرتے ہوئے شام تک تیل پہنچانے کی مبینہ کوششوں کی تحقیقات بھی کی گئیں۔ اس دوران اس جہاز کا نام بدل کرایڈرین دریا 1 رکھ دیا گیا تھا بالآخر امریکہ نے اس جہاز کے وارنٹ گرفتاری جاری کرنے کے باوجود اسے رہاکردیا۔