لیبیا میں بحریہ کے کمانڈر میجر جنرل فرج المہدوی نے خبردار کیا ہے کہ لیبیا کے ساحلوں کے نزدیک آنے والے کسی بھی ترک جہاز کو سمندر میں غرق کر دیا جائے گا۔ یہ بات یونان کی ویب سائٹ گریک رپورٹر پر منگل کے روز پوسٹ کی گئی۔ دوسری جانب ترکی کے ایوان صدارت نے بدھ کے روز کہا ہے کہ اسے امید ہے کہ لیبیا کی حکومت ترک فوجیوں کو اپنی سرزمین پر بلانے پر مجبور نہیں ہو گی۔
ویب سائٹ رپورٹ کے مطابق جنرل فرج المہدوی نے رواں ہفتے یونان کے “الفا” ٹی وی کو دیے گئے انٹرویو میں ترکی اور لیبیا کی وفاق کی حکومت کے بیچ حال ہی میں دستخط ہونے والے سمجھوتے پر شدید اعتراض کا اظہار کیا۔ یادرہے کہ المہدوی اپنے فیس بک اکاؤنٹ پر یونانی زبان میں پہلے ہی یہ پوسٹ کر چکے ہیں کہ “ہم جلد ہی دارالحکومت طرابلس کو آزاد کرا لیں گے اور ترکی کا خواب چکناچور کر دیں گے”۔
لیبیا کی پارلیمنٹ کے اسپیکر کے میڈیا مشیر فتحی المریمی بدھ کے روز باور کرا چکے ہیں کہ لیبیا کی فوج ترکی کو اُس معاہدے کی آڑ میں لیبیا کے عوام کی دولت اور ملک کے وسائل لوٹنے کی اجازت ہر گز نہیں دے گی جس پر ترکی کے صدر رجب طیب اردگان نے وفاق کی حکومت کے وزیراعظم فائز السراج کے ساتھ دستخط کیے ہیں۔