امریکی ریاست ٹیکساس کے شہر ایل پاسو میں ایک شاپنگ مارٹ میں فائرنگ کے واقعے میں 20 افراد ہلاک اور 26 زخمی ہو گئے ہیں۔ فائرنگ کا یہ واقعہ سیلو وسٹا مال کے قریب وال مارٹ سٹور میں پیش آیا جو امریکہ اور میکسیکو کی سرحد سے چند کلو میٹردور ہے۔
حکام نے ایک 21 سالہ شخص کو گرفتارکیا ہے جس کے بارے میں خیال ہے کہ وہ واحد مسلح شخص ہے۔پولیس اور ایف بی آئی اس بات کی تحقیق کر رہے ہیں کہ آیا ایک آن لائن فورم پر پوسٹ کیا گیا سفید فام قوم پرست خیالات پر مبنی ”منشور” اسی حملہ آور کی جانب سے پوسٹ کیا گیا ہے۔
امریکی میڈیا میں اس شخص کی شناخت پیٹرک کروسئس کے نام سے ہوئی ہے جسے ڈیلس کے قریبی شہر ایلن کا رہائشی بتایا جا رہا ہے۔ یہ شہر ایل پاسو سے 1046 کلومیٹر مشرق میں واقع ہے۔
امریکی صدر ڈونلڈ ٹرمپ نے اس حملے کو بزدلانہ کارروائی قرار دیتےہوئے اپنی ایک ٹویٹ میں لکھا کہ میں آج کے اس نفرت انگیز واقعے کی مذمت میں اس ملک کے ہر شہری کے ساتھ کھڑا ہوں۔ معصوم لوگوں کے قتل کی کوئی وجہ اور کوئی جواز پیش نہیں کیا جا سکتا۔
ٹیکساس کے گورنر گریگ ایبٹ نےبھی اس واقعے کو ریاست کی تاریخ کے مہلک ترین دنوں میں سے ایک قرار دیا ہے