برطانوی وزیرا عظم بورس جانسن نے حکمران جماعت کنزرویٹو پارٹی کا 12 نکاتی انتخابی منشور جاری کردیا ہےجس میں یورپی یونین سے علیحدگی کے معاہدے کی تکمیل کا وعدہ کیا گیا ہے۔ جبکہ لیبر پارٹی کے لیڈٖر جریمی کوربن نے اسے ارب پتیوں کا منشور قرار دے کر مسترد کردیا۔
تفصیلات کے مطابق حکمران جماعت کنزرویٹو پارٹی نے 59 صفحات پر مشتمل منشور انتخابات سے 18روز قبل پیش کر دیا جس میں وزیر اعظم بورس جانسن نے بریگزٹ کی تکمیل کا وعدہ کیا ہے۔ منشور میں اے ٹی کی شرح، انکم ٹیکس اور نیشنل انشورنش کی فیس نہ بڑھانا اور چائلڈ کیئر میں توسیع دے کر اسے اضافی 250 ملین پونڈز سالانہ فراہم کرنا بھی شامل ہے۔
بورس جانسن نے ہسپتالوں میں پچاس ہزار نرسز کی تعیناتی کا وعدہ بھی کیا ہے جبکہ منتخب مریضوں اور ہسپتال سٹاف کےلیے پارکنگ چارجز بھی ختم کر دیے جائیں گے۔
اپوزیشن رہنما جیرمی کوربن نے اسے ارب پتیوں کا منشور قرار دے دیا۔ لیبر پارٹی نے اسے ناامیدی کا منشور کہا ہے۔ لیبر پارٹی کے پیش کردہ منشور میں امیروں اور کاروباری طبقے پر ٹیکس بڑھانے کا اعلان کیا گیا ہے ۔اپوزیشن جماعت نے پنشن سے محروم 30 لاکھ سے زائد خواتین کو امداد دینے کا بھی وعدہ کیا ہے ۔