ایشیاء میں تیزی سے بڑھتی ہوئی معیشتوں کے ساتھ توانائی کے حصول کے سلسلے میں ، روس نے ایک اور قدم آگے بڑھایا ہے ۔ پیر کو پاور آف سائبیریا پائپ لائن کے توسط سے ، چین کو باضابطہ طور پر قدرتی گیس کی سپلائی شروع کر دی ہے۔
روسی صدر ولادیمیر پوتن اور چین کے ژی جن پنگ نے ٹیلی کانفرنس کے ذریعے ایک سرکاری تقریب میں گرین سگنل دیا۔ روس ، جو دنیا کا سب سے بڑا گیس برآمد کنندہ ہے ، دنیا کے ایک اعلیٰ صارف چین کی طرف دیکھ رہا ہے ۔ مغرب کے ساتھ ماسکو کے تعلقات خراب ہیں کیونکہ مغرب نے 2014 سے یوکرین کے تنازعہ پر ماسکو کو پابندیوں کا نشانہ بنایا ہے لہٰذا اس اقدام سے روس کو یورپ سے باہر ایک بہت بڑی نئی مارکیٹ مل گئی ہے ۔
میگا پائپ لائن ریکارڈ وقت میں بنائی گئی تھی۔ ابتدائی طور پر 20 دسمبر کو لانچ کا خیال تھا لیکن شیڈول سے قبل تعمیر مکمل ہوگئی۔ 3،000 کلومیٹر طویل (1864 میل) پائپ لائن روس کے مشرقی علاقوں میں گیس کے بڑے ذخائر سے چینی سرحد تک گیس بھیجے گی۔ اس کے بعد مشرقی سمندری حدود تک گیس کی فراہمی کے لئے چین کے اپنے نیٹ ورک کے ساتھ رابطہ قائم ہو گا اور قوم کی وسیع و عریض اور بڑھتی ہوئی توانائی کی ضروریات کو پورا کرنے میں مدد فراہم ہوگی۔
گیزپروم کے چیف ایگزیکٹو الیکسی ملر نے صدر پوتن کو چینی سرحد کے قریب کمپریشن اسٹیشن سے ویڈیو لنک کے ذریعے بتایا کہ چین میں گیس کی ترسیل کے نظام کو گیس کی فراہمی شروع کی جارہی ہے ۔