ایران کے سپریم لیڈر آیت اللہ خامنہ ای کا کہنا ہے ہم نے ایران کے بہادر سپوت جنرل سلیمانی کے قتل کا بدلہ لے کر امریکہ کے منہ پر تھپڑ مارا ہے لیکن یہ کافی نہیں ہے۔ایرانی قوم سے اپنے خطاب میں آیت اللہ خامنہ ای نے جنرل قاسم سلیمانی کو ایران کا بہادر سپوت قرار دیتے ہوئے کہا کہ قاسم سلیمانی صرف فوجی نہیں، سیاسی میدان میں بھی جرات کا مظاہرہ کرتے تھے۔
آیت اللہ خامنہ ای نے کہا کہ امریکہ چاہتا ہے عراق بھی سعودی عرب کی طرح دودھ دینے والی گائے بن جائے۔ جنرل سلیمانی نے عراق اور شام میں امریکہ کے منصوبوں کو ناکام بنایا۔ان کا کہنا تھا سلیمانی کی شہادت نے ہمیں جگا دیا ہے۔ دنیا ہمارے جاہ و جلال کو دیکھ چکی ہے۔ گذشتہ رات ہم نے بدلہ لےکر امریکہ کے منہ پر تھپڑ مارا لیکن صرف فوجی کارروائی کافی نہیں ہے۔
آیت اللہ خامنہ ای نے کہا کہ ہمارا دشمن امریکہ اور یہودی ریاست ہے اور ہمیں انہیں پہچاننے میں کوئی غلطی نہیں کرنی چاہیے کیونکہ دشمن ہمارے اندر شکوک پیدا کر کے ہماری دفاعی طاقت کو منتشر کرنا چاہتا ہے۔انھوں نے مزید کہا کہ یہ بہت ضروری ہے کہ ہم اپنے دشمن اور اس کے منصوبوں کو پہنچانیں۔ ہمیں دشمن کا مقابلہ کرنے کے لیے خود کو سیاسی، سائنسی اور دفاعی میدان میں آگے بڑھنا چاہیے۔
یاد رہے کہ 3 جنوری کو امریکہ نے عراق کے دارالحکومت بغداد میں ائیرپورٹ کے قریب راکٹ حملہ کر کے ایران کی القدس فورس کے کمانڈر میجرجنرل قاسم سلیمانی کو ہلاک کردیا تھا۔ایران نے جنرل قاسم سلیمانی کے قتل کا بدلہ لینے کا اعلان کرتے ہوئے تاریخی شہر قم کی جمکران مسجد میں انتقام کی علامت والا سرخ پرچم بھی لہرا دیا تھا۔
گذشتہ روز ایران نے عراق میں دو امریکی فوجی اڈوں پر راکٹوں سے حملہ کر کے امریکی فوج کا بھاری جانی و مالی نقصان ہونے کا دعویٰ کیا ہے۔