اسرائیلی صدر ریوین ریولین , سابق فوجی سربراہ اور بیلو اینڈ وائٹ پارٹی کے رہنما بینی گینٹس کو نئی حکومت بنانے کے لیے باضابطہ دعوت دیں گے ۔ اس پیش رفت کو موجودہ وزیر اعظم بینجمن نیتن یاہو کے لیے بڑا دھچکا قرا ردیا جارہا ہے۔
سیاسی عدم استحکام سے دوچار اسرائیل میں ایک برس سے کم عرصے میں حکومت سازی کی یہ تیسری کوشش ہے جہاں اس وقت کورونا وائرس کی وبا سے نمٹنے کے لیے ایک ‘ایمرجنسی‘ حکومت کی مانگ خاصی زور پکڑ گئی ہے۔اسرائیلی صدر ریولین کے دفتر سے جاری ایک بیان میں کہا گیا ہے کہ صدر،کچول لاوان (بلیو اینڈ وائٹ پارٹی) کے سربراہ بینی گینٹس کو حکومت سازی کی ذمہ داری سونپیں گے۔”
واضح رہے کہ اسرائیلی صدر نے بینی گینٹس کو حکومت سازی کے لیے مدعو کرنے کا فیصلہ اس وقت کیا جب متعدد اراکین پارلیمان نے انہیں بینجمن نیتن یاہو کے حریف بلیو اینڈ وائٹ پارٹی کے سربراہ کی حمایت کرنے کی یقین دہانی کرائی۔ اسرائیلی صدر ریولین نے اپنے فیصلے کا اعلان اتوار کے روز اسرائیلی پارلیمان میں نمائندگی کرنے والی تمام موجودہ سیاسی جماعتوں کے رہنماوں کے ساتھ صلاح و مشورہ کرنے اور اس کے بعد وزیر اعظم بینجمن نیتن یاہو کے ساتھ ہنگامی میٹنگ کے بعد کیا۔
خیال رہے کہ اسرائیل میں گذشتہ دومارچ کو ایک برس کے اندر تیسری مرتبہ عام انتخابات کرائے جانے کے باوجود کسی بھی پارٹی یا اتحاد کو واضح اکثریت حاصل نہ ہونے کی وجہ سے اسرائیلی صدر کے انتخاب کا کام کافی مشکل ہوگیا تھا۔ گوکہ بینجمن نیتن یاہو کی لیکوڈ پارٹی حالیہ انتخابات میں 48 سیٹیں حاصل کرکے سب سے بڑی پارٹی بن کر ابھری ہے لیکن اتوار کے روز دیگر پارٹیوں کے ساتھ صلاح و مشورے کے بعدیہ بات واضح ہوگئی کہ وہ حکومت سازی کے لیے ضروری 120رکنی اسرائیلی پارلیمان میں کم از کم 61 ممبران پارلیمنٹ کی حمایت سے تین سیٹیوں سے پیچھے رہ گئی ہے۔ دوسری طرف گینٹس کی بلیو اینڈ وائٹ پارٹی دیگر چھوٹی جماعتوں کی حمایت سے 61 سیٹیں حاصل کرنے میں کامیاب ہوگئی۔
تاہم یہ کہا جا رہا ہے کہ گینٹس سے حکومت سازی کے لیے صدر ریولین کی درخواست اس بات کی ضمانت نہیں ہے کہ وہ ایک مستحکم حکومت قائم کرنے میں کامیاب بھی ہوجائیں گے، کیونکہ اپوزیشن جماعتوں میں بھی آپس میں کئی امور پر شدید اختلافات رکھتی ہیں۔ گینٹس کی حمایت کرنے والوں میں عرب نواز جماعت کے علاوہ انتہائی قوم پرست اسرائیلی جماعت بیتینو شامل ہے۔
یاد رہے کہ اسرائیلی صدر کی طرف سے گینٹس کو حکومت سازی کے لیے باضابطہ مدعو کیے جانے کے بعد انہیں ایک ماہ کے اندراپنی حکومت تشکیل دینی ہوگی۔