واشنگتن :امریکی صدارتی انتخابات میں جیت کے لیے امیدواروں میں دوڑ جاری ہے ۔ دیکھنے میں آیا ہے کہ جوبائيڈن کی مقبولیت میں اضافہ ہوا اوراس دوڑ میں ٹرمپ پیچھے رہ گئے۔اطلاعات کے مطابق ریاست پنسلوانیا میں ٹرمپ کی نسبت جوبائيڈن کی مقبولیت میں اضافہ ہوا واضح رہے امریکی انتخابات میں اس ریاست کی بہت اہمیت ہے۔
ریاست پنسلوانیا، سیاسی لحاظ سے امریکہ کی سب سے اہم ترین ریاستوں میں سے ایک ہے اور دلچسپ بات یہ ہے کہ یہاں پر ڈیموکریٹک یا ری پبلکن پارٹی کے امیدواروں کو کبھی مسلسل کامیابی حاصل نہیں ہوتی بلکہ ایک بار ڈیموکریٹک امیدوار جیتتا ہے تو دوسری بار ری پبلکن امیدوار فتح حاصل کرتا ہے۔
امریکی نیوز ویب سائٹ ہل کی رپورٹ کے مطابق ہارپر سروے اسٹیشن نے جمعے کے روز شائع ہونے والے اپنے سروے کے نتائج میں بتایا ہے کہ ریاست پنسلوانیا کے انچاس فیصد ممکنہ رائے دہندگان نے کہا کہ وہ یقینی یا ممکنہ طور پر بائیڈن کو ووٹ ديں گے جبکہ تینتالیس فیصد نے ٹرمپ کو پسند کیا ہے ۔اس سروے کے نتائج میں کہا گيا ہے کہ ریاست کے آٹھ فیصد رائے دہندگان نے ابھی اپنا آخری فیصلہ نہیں کیا ہے۔
سروے کو مد نظر رکھتے ہوئے اندازہ لگایا جا رہا ہے کہ تین نومبر کو امریکہ میں ہونے والے صدارتی انتخابات میں ریاست پنسلوانیا کا اہم کردار ہوگا۔ پنسلوانیا، مشی گن اور ویسکنسین ان ریاستوں میں سے ہیں جن میں 2016 ءکے صدارتی انتخابات میں ڈیموکریٹس کو فتح کا مکمل یقین تھا لیکن وہاں ٹرمپ کو فتح حاصل ہوئي تھی۔