انٹرنیٹ، نیٹ ورکنگ ماہرین نے آپٹیکل فائبر کے ذریعے 178 ٹیرابائٹ فی سیکنڈ کی رفتار سے ڈیٹا منتقل کرکے انٹرنیٹ رفتار کا نیا ریکارڈ قائم کردیا ہے۔ یعنی اب 15 گیگابائٹ والی 1500 ویڈیو صرف ایک سیکنڈ میں ڈاؤن لوڈ کی جاسکتی ہیں۔
آپٹیکل فائبر سے ڈیٹا منتقلی کا سابقہ ریکارڈ 150.3 ٹیرابائٹ فی سیکنڈ کا تھا جو 2018 میں جاپان میں قائم کیا گیا تھا۔ موجودہ ریکارڈ اس سے تقریباً 18.5 فیصد زیادہ تیز ہے۔
اگرچہ یہ کامیابی تجرباتی اور محدود پیمانے پر حاصل کی گئی ہے لیکن ماہرین کا کہنا ہے کہ آپٹیکل فائبر کے موجودہ انفرا اسٹرکچر میں معمولی اور کم خرچ تبدیلی کے بعد یہ ٹیکنالوجی بڑی سہولت سے انٹرنیٹ کو غیرمعمولی طور پر تیز رفتار بنا سکے گی۔
واضح رہے کہ اس وقت ڈاؤن لوڈنگ کے حوالے سے دنیا بھر میں براڈ بینڈ انٹرنیٹ کی اوسط رفتار 81.46 میگابائٹ فی سیکنڈ، جبکہ فور جی موبائل انٹرنیٹ کی اوسط رفتار 34.51 میگابائٹ فی سیکنڈ ہے۔ بطورِ مجموعی 110.9 میگابائٹ فی سیکنڈ کی ڈاؤن لوڈ رفتار کے ساتھ متحدہ عرب امارات ساری دنیا میں پہلے نمبر پر ہے۔
موبائل انٹرنیٹ میں اوسطاً 17 میگابائٹ فی سیکنڈ ڈاؤن لوڈ رفتار اور 11.40 میگابائٹ فی سیکنڈ اپ لوڈ رفتار کے ساتھ پاکستان کا 112 واں نمبر، جبکہ براڈ بینڈ انٹرنیٹ میں اوسطاً 9.40 میگابائٹ فی سیکنڈ ڈاؤن لوڈ رفتار اور 7.85 میگابائٹ فی سیکنڈ کی اپ لوڈ رفتار کے ساتھ 159 واں نمبر ہے۔
یونیورسٹی کالج لندن میں سب سے تیز رفتار انٹرنیٹ کی یہ نئی کامیابی کیسے حاصل کی گئی ہے؟ اس کی تمام تفصیلات ’’آئی ٹرپل ای فوٹونکس ٹیکنالوجی لیٹرز‘‘ کے تازہ شمارے میں آن لائن شائع ہوئی ہیں۔