افغانستان کے شہر بامیان میں دو بم دھماکوں میں 17 افراد جاں بحق 50 سے زائد زخمی ہو گئے ہیں۔ پولیس کی ابتدائی تحقیقات کے مطابق بم مرکزی بازار میں سڑک کنارے نصب کیے گئے تھے۔
جاں بحق ہونے والوں میں 15 شہری جبکہ 2 ٹریفک پولیس اہلکار شامل ہیں، جبکہ زخمی ہونے والے افراد میں سے زیادہ تر نزدیکی ریسٹورنٹ میں موجود تھے۔ پولیس کے مطابق دونوں دھماکے ایک کلو میٹر کے دائرے میں ہوئے، جس کے باعث زیادہ نقصان ہوا ہے۔
واضح رہے کہ بامیان کو افغانستان کا محفوظ ترین شہر مانا جاتا ہے، اور یہاں ہر سال ہزاروں سیاح آثار قریمہ کی سیر کے لیے بھی آتے ہیں۔ جس میں نمایاں بدھا کا مجسمہ ہے، جسے طالبان نے اپنے دور حکومت کے آخر میں توڑ دیا تھا۔
طالبان نے حالیہ دھماکوں کی مذمت کی ہے اور کہا ہے کہ وہ کبھی بھی شہریوں پر حملوں کو درست نہیں مانتے۔