ہسپانوی محقق اور اقوام متحدہ کے نمائندہ برائے صاف پانی اور نکاسی آب پیدرو عروجو نے خطرے کا اظہار کیا ہے کہ قدرت کی نعمت پانی پر انسان کا بنیادی حق خطرے میں ہے، اور مستقبل میں اسے تیل اور سونے کی طرح تجارت کے لیے استعمال کرنے کے لیے راہ ہموار کی جا رہی ہے۔
عروجو کا کہنا ہے کہ وال سٹریٹ میں مستقبل کے کاروبار کے حوالے سے شائع ہونے والی ایک خبر میں پانی کو بطور تجارتی شے دکھایا گیا ہے، ایسا رحجان پیدا کرنا بنیادی انسانی حق چھیننے کی کوششوں کے مترادف ہے، اور عمل ایک بڑے خطرے کی عکاسی کرتا ہے۔ پانی انسانی صحت اور زندگی کا بنیادی عنصر ہے، اسکی مفت دستیابی میں رکاوٹ انتہائی خطرناک ہو گا، اور ایسے رحجان کی حوصلہ شکنی کرنا ہو گی۔
پانی کی بڑھتی کمی سے متعلق دیگر ماہرین کا کہنا ہے کہ ماحولیاتی مسائل، خشک سالی اور آبادی انکی بظاہر وجوہات ہیں، اور آئندہ کچھ سالوں میں پانی انسانی تہذیب کا سب سے اہم مدعہ ہو گا، اس لیے ابھی سے اسے سنبھالنا ضروری ہے۔