امریکی صدر ڈونلڈ ٹرمپ نے صدارتی انتخابات میں ووٹنگ مشینوں کے سافٹ ویئر کو ہیک کرنے اور دھاندلی کرنے کا ذمہ دار روس کو ٹھہرانے سے واضح انکار کرتے ہوئے چین پر شبہے کا اظہار کیا ہے۔
اپنی ایک ٹویٹ میں صدر ٹرمپ کا کہنا تھا کہ سائبر حملے جھوٹی خبروں سے بھی بڑا مسئلہ ہے، لیکن فکر کی کوئی بات نہیں ہے، سب کچھ کنٹرول میں ہے، ہر وقت روس کا راگ الاپا جاتا ہے، کیونکہ اسے لبرل ذرائع ابلاغ نے بدنام کر رکھا ہے اور اس سے کچھ لوگوں کے مالی فائدے جڑے ہیں، لیکن ممکن ہے کہ دھاندلی چین نے کی ہو۔ ٹویٹ میں صدر ٹرمپ نے مزید کہا ہے کہ اس سے ہماری انتخابی مشینوں کی حقیقت بھی کھل گئی ہے۔
دوسری طرف معاملے پر اپنی رائے کے اظہار میں وزیر خارجہ مائیک پومپیو نے بروز جمعہ کہا تھا کہ انہیں معلومات ملی ہیں کہ انتخابات میں روس نے دھاندلی کی راہ ہموار کی، جبکہ ایک ٹی وی پروگرام میں پومپیو کا کہنا تھا کہ روس امریکہ کا دشمن ہے اور صدر پوتن آزادی پسند معاشروں کے لیے سب سے بڑا خطرہ ہیں۔
روس نے اپنے جواب میں تمام الزامات کی تردید کی ہے۔