امریکہ میں 11 فوجی اہلکار شراب کی غلطی میں زہریلا کیمیکل نوش کر گئے ہیں، جس کے باعث دو کی حالت انتہائی تشویشناک ہے جبکہ 9 کی حالت اب خطرے سے باہر ہے۔
اطلاعات کے مطابق ریاست ٹیکساس میں جاری دس روزہ مشقوں میں شامل فوجی اہلکاروں کے ایک گروہ نے الکوحل کے مغالطے میں گاڑی کے انجن کو سردیوں میں جمنے سے بچانے کے لیے ڈالے جانے والے کیمیکل پی لیا ہے۔ کیمیکل پیتے ہی پورے گروہ کی حالت بگڑ گئی اور انہیں فوری نزدیکی اسپتال پہنچا دیا گیا۔
مشقوں کے ترجمان کا کہنا ہے کہ معاملے کی تحقیقات کی جا رہی ہیں تاہم پہلی ترجیح اہلکاروں کی جان بچانا ہے۔ واضح رہے کہ قانون کے مطابق مشقوں کے دوران الکوحل کے استعمال کی اجازت نہیں ہے، اور اس سلسلے میں خوراک مہیا کرنے والی کمپنی سے بھی تفتیش کی جا رہی ہے۔
طبی عملے کے مطابق کیمیکل میں شامل ایتھیلین گلائیکول انتہائی خطرناک مرکب ہے اور یہ فوری انسانی عضلات کو تباہ کر سکتا ہے، اس سے گردے فوری کام کرنا چھوڑ دیتے ہیں اور خوراک کی نالی اور باقی عضلات بھی متاثر ہوتے ہیں۔ تاہم ممکنہ طور پر کم مقدار نگلنے کے باعث اہلکاروں کی بڑی تعداد بڑے نقصان سے محفوظ رہی ہے۔
زیرعلاج فوجی اہلکاروں میں 1 آفیسر، 2 زیر تربیت آفیسر اور 8 سپاہی شامل ہیں۔