روس اور نیٹو کے مابین یوکرین کو لے کر کشیدگی میں اضافہ جاری ہے۔ روس کے مطابق سرحدی خلاف ورزی پر روسی فوج نے 5 یوکرینی فوجی مار دیے ہیں۔
فوج کی طرف سے جاری بیان میں کہا گیا ہے کہ یوکرینی فوج کے ایک جتھے نے سرحد کی خلاف ورزی کرتے ہوئے روس میں داخل ہونے کی کوشش کی جس پر فوری کارروائی کرتے ہوئے روسی فوج نے 5 حملہ آور فوجیوں کو مار گرایا۔ بیان کے مطابق یوکرینی فوج کا جتھہ ممکنہ طور پر معلومات اکٹھی کرنے اور محدود کارروائی کے لیے روسی سرحد میں داخل ہوا۔ ایسے میں روسی جوابی کارروائی پر گروہ کی مدد کے لیے یوکرینی فوج کی دو عسکری گاڑیاں بھی روس میں داخل ہوئیں جنہیں فوری تباہ کر دیا گیا ہے۔
جاری بیان میں کارروائی کے دوران کسی روسی فوجی کی ہلاکت یا زخمی نہ ہونے کا دعویٰ بھی کیا گیا ہے۔
یوکرین نے روس کی جانب سے اس دعوے کی تردید کی ہے کہ یوکرینی فوجی جتھے نے روس میں داخل ہونے یا کسی کارروائی کی کوشش کی، وزارت خارجہ کے ترجمان نے تفصیلات جلد مہیا کرنے کا بیان جاری کیا ہے تاہم روس کے اس دعوے کو بھی مسترد کیا ہے کہ روسی کارروائی میں یوکرینی فوجی مارے گئے۔