روس نے یوکرین کو جنگ بندی کی پیشکش کر دی ہے۔ کریملن کے نمائندہ برائے ذرائع ابلاغ دیمتری پیسکوو نے میڈیا سے گفتگو میں کہا کہ روس یوکرین کی جانب سے ہتھیار ڈالنے کی شرائط پر بات کرنے کو تیار ہے۔ انکا کہنا تھا کہ صدر ولادیمیر پوتن یوکرین کے ساتھ بات چیت کرنے کو تیار ہیں، جس میں اس بات کی توثیق کی جا سکے کہ یوکرین سرحد پر خودمختار ریاستوں کے خلاف عسکری کارروائی نہیں کرے گا۔
انکا کہنا تھا کہ یہی وہ رستہ ہے جس سے یوکرین کو اس کے ہمسایہ علاقوں میں مداخلت اور مظالم سے روکا جا سکتا ہے، اسے اپنے ہتھیار ڈالنا ہوں گے۔ روس یوکرین کی کارروائیوں کو اسکے مفادات، اور لوگوں کے لیے ایک خطرے کے طور پر دیکھتا ہے۔
ترجمان روسی صدر کا مزید کہنا تھا کہ یہ وہ رستہ ہے جس سے صدر پوتن نام نہاد سرخ لائن کہلائے جانے والے مسائل کو حل کرنے کی امید کرتے ہیں۔ یوکرین خود کی غیر جانب داری کا اعلان کرے اور ہتھیاروں کی تنصیب ترک کرے۔
ترجمان کا مزید کہنا تھا کہ یوکرین سے بات چیت کے مقام اور وقت کا اعلان صدر پوتن خود کریں گے، لیکن یہ تب ہی ممکن ہو گا اگر یوکرینی قیادت اس میں دلچسپی رکھتی ہو۔
کریملن ترجمان نے واضح طور پر کہا کہ انکی کارروائیوں کے اپنے مقاصد ہیں اور انہیں ہر حال میں حاصل کیا جائے گا۔ صدر نے اعلان کیا ہے کہ روس اپنے مفادات پر سمجھوتہ نہیں کرے گا، اور اگر یوکرین چاہتا ہے کہ اس کے خلاف کارروائیاں روکی جائیں تو اسے شرائط پوری کرنا ہوں گی۔
واضح رہے کہ روس نے بروز جمعرات صبح سحری کے وقت یوکرین کے خلاف محدود عسکری کارروائی کا آغاز کیا تھا جس کا مقصد یوکرین کو سرحدی علاقوں میں روسی حمایت یافتہ دونباس کے علاقوں کو تحفظ فراہم کرنا تھا۔
دونباس کی مقامی حکومتوں نے یوکرین پر الزام لگایا تھا کہ گزشتہ 8 برس ایک طرف لیکن گزشتہ کچھ ہفتوں سے یوکرین نے ان علاقوں میں فوجی کارروائیاں بڑھا دی ہیں۔ جس پر مقامی حکومتوں نے روس سے امداد کی درخواست کی۔ صدر پوتن نے ان حالات کے پیش نظر یوکرین کو تنبیہ کی کہ نیٹو کی ایماء پر مقامی آبادی پر ظلم کو روکا جائے تاہم مثبت ردعمل سامنے نہ آنے پر روس نے بروز جمعرات یوکرین کے خلاف محدود کارروائی کا آغاز کر دیا۔