امریکی اخبار نیو یارک ٹائمز کے مطابق امریکی خفیہ ایجنسی سی آئی اے کو دنیا بھر میں ایجنٹوں کی شدید کمی کا سامنا ہے۔ اخبار کے مطابق اس کے ہاتھ ایجنسی کے اعلیٰ عہدےدار کا ایک خط لگا ہے جو ایجنسی نے دنیا بھر میں اپنے اسٹیشنوں کو بھیجا تھا۔ خط میں اسٹیشنوں کو مطلع کیا گیا ہے کہ ایجنسی کو ایجنٹوں کی شدید کمی کا سامنا ہےاور اسکے ایجنٹ یا تو مارے جا رہے ہیں یا پکڑے جا رہے اور کچھ ڈبل ایجنٹ بن گئے یا لاپتہ ہو گئے ہیں۔ اخبار کے مطابق خط گزشتہ ماہ ارسال کیا گیا تھا۔
نیو یارک ٹائمز کی رپورٹ میں کہا گیا ہے کہ ایجنسی نے دنیا بھر میں اپنے اسٹیشنوں کو فوری بھرتیوں کا کہا ہے اور اسے اس وقت مکمل اعتماد جیتے بغیر چھوٹے عہدوں سے افراد کو اہم عہدوں پر لانا پڑ رہا ہے، جس سے اس کے کام کے شدید متاثر ہونے کا خطرہ ہے۔ خط کے مطابق ایجنسی پہلے ہی خبریوں کی غلط معلومات کے باعث کافی نقصان اٹھا چکی ہے۔
تجزیہ کاروں کا کہنا ہے کہ سی آئی اے کے کسی ایسے مکتوب کا سامنے آجانے کا مطلب ہے کہ ایجنسی اس وقت افرادی سطح پر شدید بحران کا شکار ہے، جبکہ کچھ کا کہنا ہے کہ اس کا مقصد اسٹیشنوں کو پیغام دینا تھا کہ خبریوں کو کھینچا جائے اور ڈبل ایجنٹوں سے جان چھڑائی جائے۔ خط میں خصوصی طور پر ایران اور چین میں موجود ایجنٹوں پر کارکردگی بہتر کرنے کا زور دیا گیا ہے۔
نیو یارک ٹائمز کے مطابق جب اخبار نے سی آئی اے سے خط اور اسکے متن سے متعلق سوال کیا تو کوئی تبصرہ نہیں دیا گیا۔