نائجیریا میں جیل پر بھاری اسلحے سے ہوئے حملے کے نتیجے میں 800 سے زائد قیدی فرار ہو گئے ہیں۔ انتظامیہ کے مطابق حملہ رات گئے ملک کے مغربی علاقے اویو میں ہوا جہاں اچانک حملہ آوروں نے جیل کی دیواروں میں بارود سے بڑے سوراخ کر دیے اور اندر گھس گئے۔ انتظامیہ کے مطابق جیل سکیورٹی نے دفاع کی بھرپور کوشش کی لیکن بھاری اسلحے کے سامنے دفاع میں ناکام رہے، اور حملہ آور قیدیوں کو فرار کرانے میں کامیاب ہو گئے۔
انتظامیہ کے مطابق 262 قیدیوں کو واپس گرفتار کر لیا گیا ہے جبکہ 575 تاحال لاپتہ ہیں۔ حملے میں کونسا گروہ یا افراد شامل تھے تاحال اس حوالے سے کوئی اطلاع نہیں ہے۔ نہ کسی گروہ نے حملے کی ذمہ داری قبول کی ہے۔
انتظامیہ کے مطابق حملہ آوروں نے صرف ان قیدیوں کو فرار کروایا ہے جن کے مقدمات ابھی زیر سماعت تھے جبکہ سزا یافتہ 62 قیدی اور خواتین قیدی تاحال زیر حراست ہیں۔
یاد رہے کہ رواں سال اپریل میں بھی نائجیریا کی ایک جیل سے حملہ آور 2000 قیدی فرار کروا کر لے گئے تھے۔