نام نہاد دہشت گردی کے خلاف امریکی جنگ اور سامراجی منصوبوں میں ناکامی کے بعد امریکہ ہی نہیں اسکے اتحادی بھی شدید پریشانی کا شکار ہیں۔ سعودی عرب کے جاسوس ادارے کے سابق سربراہ، امریکہ میں سابق سعودی سفیر، عالمی امور کے ماہر اور شاہی خاندان کے اہم ترین افراد میں سے ایک; شہزادہ ترکی الفیصل نے اسی حوالے سے ایک تازہ انٹرویو میں امریکہ پر شدید بداعتمادی کا اظہار کیا ہے۔
شہزادہ ترکی الفیصل کا کہنا تھا کہ مشرق وسطیٰ خصوصاً افغانستان میں امریکی ناکامی کے بعد خلیجی ممالک کے امریکہ پر اعتماد کو شدید دھچکا لگا ہے۔ مقامی حکومتیں شدید تذبذب کا شکار ہیں کہ امریکہ اور اسکی نئی قیادت کس حد تک اپنی مسلم اتحادی حکومتوں کے تحفظ کو یقینی بنا سکتی ہے۔
شہزادہ فیصل کا کہناتھا کہ امریکہ اور خلیجی ممالک کا اتحادعلاقائی استحکام کا ضامن رہا ہے، لیکن صدر بائیڈن اس حوالے سے زیادہ فکرمند نظر نہیں آرہے، انہیں بہت سوچ سمجھ کر آئندہ کی حکمت عملی بنانی چاہیے، تاریخی اتحاد کو محفوظ رکھنے کے لیے نیا سکیورٹی ڈھانچہ اور معاہدہ کرنے کی ضرورت ہے، لاپرواہی کے اثرات بہت دور است ہوں گے۔
شہزادہ فیصل نے اپنی رائے کی وضاحت کرتے ہوئے کہا کہ افغانستان میں مکمل ناکامی اور عراق میں بھی ملتی جلتی صورتحال اشارہ ہے کہ نہ تو امریکہ اب بڑی قوت رہا ہے اور نہ ہی نیٹو کے پاس اپنے قیام کا جواز بچا ہے۔ انکا کہنا تھا کہ 7 دہائیوں میں ہی امریکی سفر تمام ہو گیا ہے، امریکہ کے مستقبل کے بارے میں بے یقینی عروج پر ہے، اور یہ صورتحال مشرق وسطیٰ کے تذبذب کی بڑی وجہ ہے، اور یہ خوف درست بھی ہے۔
افغانستان سے انخلاء کے طریقہ کار پر گفتگو کرتے ہوئے سعودی شہزادے کا کہنا تھا کہ یہ امریکی نااہلی، لاپرواہی اور بدانتظامی کی عکاسی تھا۔ امریکہ اور نیٹو کی جانب سے جو اسلحہ افغانستان میں چھوڑا گیا، وہ سعودی عرب کے دشمنوں سمیت کسی کے بھی ہاتھ لگ سکتا ہے، سعودی عرب نے اس حوالے سے اپنے تحفظات کا اظہار کر دیا ہے۔
انکا کہنا تھا کہ موجودہ حالات میں امریکہ کو سعودی عرب سے اپنی جنگی مشنری نکالنے کے بارے میں 2 بار سوچنا چاہیے۔ ممکنہ طور پر سعودی شہزادے کا اشارہ پیٹریاٹ دفاعی نظام کی طرف تھا جو امریکہ نے 2019 میں سعودی تیل ریفائنریوں پر حملوں کے بعد نصب کیا تھا۔ صدر بائیڈن اسے سعودی عرب سے ہٹانے کے ارادے کا اظہار کر چکے ہیں۔ شہزادہ فیصل کا کہنا تھا کہ کوئی بھی ایسا قدم امریکہ کے سعودی دفاع کے لیے موجود معاہدے کی خلاف ورزی ہو گا، اور سعودی عرب مجبوراً دفاع کے لیے نئے اتحادی تلاش کرے گا۔
شہزادہ بن فیصل کا کہنا تھا کہ سعودی عرب کو ایران اور حوثیوں سے شدید خطرات لاحق ہیں، یمن میں باغیوں کے خلاف جنگ ابھی جاری ہے۔ ایسی صورتحال میں امریکی رویہ مقامی قیادت کو سخت فیصلوں پر مجبور کر رہا ہے۔
یاد رہے کہ امریکہ نے فروری میں سعودی عرب کی یمن میں جنگی کارروائیوں سے علیحدگی اختیار کر لی تھی، اور اربوں ڈالر کے جدید ہتھیاروں کا معاہدہ بھی روک دیا تھا۔