ایران نے اسرائیل کو خطے میں اپنے مفادات کے منافی اقدامات پر سخت ردعمل کی دھمکی دی ہے۔ایرانی وزارت خارجہ کے ترجمان عباس موسوی نے بدھ کے روز اپنے ایک بیان میں کہا ہے کہ ’’اگر اسرائیلی رجیم نے شام اور خطے میں ہمارے ملک کے مفادات کے منافی کسی قسم کا جارحانہ یا احمقانہ اقدام کیا تو اس کو تباہ کن ردعمل کا سامنا کرنا پڑے گا۔‘‘
ایرانی حکام نے اسرائیل پر شام میں تہران کی اتحادی فورسز پر فضائی حملوں کا الزام عاید کیا ہے۔اسرائیل نے گذشتہ ہفتے شام کے دارالحکومت دمشق اور سرحدی صوبہ القنیطرہ میں ایران اور اس کی اتحادی ملیشیاؤں کو اپنے فضائی حملوں میں نشانہ بنایا تھا۔
یاد رہے کہ اسرائیل شام میں گذشتہ نوسال سے جاری خانہ جنگی کے دوران میں ایران اور اس کی اتحادی حزب اللہ اور دوسری ملیشیاؤں پر بیسیوں فضائی حملے کرچکا ہے اور ان میں دسیوں ایرانی فوجی افسر اور سیکڑوں جنگجو ہلاک ہوچکے ہیں۔