عالمی مالیاتی فنڈ (آئی ایم ایف) نے کرونا وائرس سے متاثرہ اور اس کے باعث معاشی مشکلات کے شکار ممالک کو 1 کھرب ڈالر تک صفر شرح سود پر قرضہ دینے کا اعلان کیا ہے۔عالمی خبر رساں ادارے کے مطابق آئی ایم ایف کی منیجنگ ڈائریکٹر کرسٹالینا جورجیفا نے رکن ممالک کو کرونا وائرس سے نبرد آزما ہونے اور معیشت کی بحالی کے لیے 1 کھرب ڈالر تک کا قرضہ دینے پر رضامندی کا اظہار کرتے ہوئے بتایا کہ قرضہ صفر شرح سود پر ابھرتی اور ترقی پذیر معیشتوں کو 50 ارب ڈالر جبکہ کم آمدنی والے رکن ممالک کو 10 ارب ڈالر تک دیا جائے گا۔
منیجنگ ڈائریکٹر کرسٹالینا جورجیفا نے مزید کہا کہ 20 ممالک نے قرضوں کے لیے دلچسپی کا اظہار کیا ہے اور ہماری کوشش ہے کہ کرونا وائرس سے متاثرہ ممالک کو ترجیحی بنیاد پر اور تیز رفتاری سے بلا سود قرضے جاری کیے جائیں تاکہ معاشی بحران کے شکار اور مالی مدد کے حق دار ممالک کو اپنے امور چلانے کے لیے کچھ سہارا مل سکے۔ اس کے علاوہ سی سی آر ٹی فنڈزغریب ممالک کو فوری طور پر قرضوں سے نجات دلانے میں بھی مدد فراہم کرنے پر غور کررہا ہے۔
یاد رہے کہ عالمی مالیاتی فنڈ پہلے ہی مجموعی طور پر 200 ارب ڈالر کی ادائیگی کا وعدہ کرچکا ہے جب کہ 15 مارچ کو امریکی فیڈرل ریزرو نے معاشی نمو کی حوصلہ افزائی کے لیے سود کی شرح صفر کر دی تھی اور معیشت کو کرونا وائرس کے اثرات سے بچانے کے لیے 700 ارب ڈالر کے پروگرام بھی شروع کیے۔