ايرانی پاسداران انقلاب کے سربراہ میجرجنرل حسین سلامی نےامریکہ کودھمکی دیتے ہوئے کہا کہ ایران اپنے بحری جہازوں کےلئے خطرہ بننے والے امريکی جہاز تباہ کردےگا۔ اطلاعات کےمطابق ایرانی کشتیوں کو تباہ کرنے کی امریکی صدرکی دھمکی پر ایران کا کہنا ہے کہ وہ بھی اپنے بحری جہازوں کے لیے خطرہ بننے والے امريکی جہاز تباہ کردے گا۔خیال رہے کہ گذشتہ روز امریکی صدر ڈونلڈ ٹرمپ نے ایک ٹوئٹ میں کہا تھا کہ انہوں نے امریکی بحریہ کو ہدایت کی ہےکہ اگر ایرانی جنگی کشتیاں امریکی جہازوں کو خوفزدہ کریں تو انہیں تباہ کردیا جائے۔
ايرانی پاسداران انقلاب کے سربراہ میجرجنرل حسین سلامی نے امریکی صدر ڈونلڈ ٹرمپ کے ٹؤیٹ پراپنے ردعمل میں کہا ہے کہ ہم امریکیوں پر واضح کردینا چاہتے ہیں کہ ہم پرعزم اورسنجیدہ ہیں، دشمن کی جانب سے کسی بھی ایکشن کا فوری ردعمل دیا جائے گا۔میجرجنرل حسین سلامی کا کہنا ہے کہ انہوں نے ایرانی کشتیوں کو نقصان پہنچانے پرامریکی جہازوں اور فورسزکونشانہ بنانےکاکہہ دیا ہے۔ ہم اپنی قومی سلامتی اور سمندری حدود کی خلاف ورزی کو برداشت نہیں کریں گے۔
یاد رہے کہ گذشتہ دنوں امریکہ نے الزام عائد کیا تھا کہ پاسداران انقلاب کی گن بوٹس خلیج فارس میں امریکی بحریہ کے جہازوں کو ہراساں کرنے جیسے اقدامات کررہی ہیں۔جواب میں ایران کی جانب سے امریکہ کے الزام کی تردید کرتے ہوئے کہا گیا تھا کہ امریکی بحریہ کی جانب سے ایک ایرانی جہاز کا راستہ روکا گیا تھا ۔