ہفتہ, اکتوبر 31 Live
Shadow

امریکی سیاستدان چین کو انتخابی مباحثے میں مت گھسیٹیں: چینی اخبار

چین نے امریکہ کو تنبیہ کی ہے کہ مقامی انتخابات میں چین کو مت گھسیٹا جائے۔ چین کی حکومتی جماعت، کیمونسٹ پارٹی کے ابلاغی ادارے کی شہرت کے حامل اخبار پیپلز ڈیلی کے اداریے میں امریکی سیاستدانوں کو مخاطب کرتے ہوئے کہا گیا ہے کہ مقامی انتخابات میں چین کو بدنام کرنے کے رویے کو ترک کیا جائے، امریکی انتخابات سے چین کا کوئی لینا دینا نہیں ہے۔

اداریے میں کہا گیا ہے کہ امریکی انتخابات کلی طور پر ایک مقامی مشق ہے، جس میں چین کا کوئی عمل دخل نہیں۔

اداریے میں مزید کہا گیا ہے کہ امریکہ اپنے مفاد میں اپنا دشمن خود بناتا ہے، جب کہ اسکا حقیقی دشمن یہ خود ہے۔ امریکہ کا چین کو نشانہ بنانا اس کی بلا وجہ جنگ میں کود جانے کی خواہش کو ظاہر کرتا ہے۔

اداریہ امریکی صدارتی مباحثے سے محض چند گھنٹے پہلے شائع کیا گیا ہے۔ یاد رہے کہ امریکی صدارتی مباحثے کو ملک کی آئندہ چار سالوں کی پالیسیوں کے وضع کرنے کے حوالے سے بہت اہمیت حاصل ہے، جس میں دونوں صدارتی امیدوار اپنی اپنی حکمت عملی کو عوام کے سامنے پیش کرتے ہیں۔

تاہم گزشتہ کچھ عرصے سے یہ مباحثے نجی حملوں اور بے ہودہ الزامات سے زیادہ کچھ نہیں رہے، یہی وجہ ہے کہ گزشتہ انتخابات سے قبل ہونے والے صدارتی مباحثوں کو چینی اخبارات نے آڑے ہاتھوں لیا اور انہیں بنیاد بنا کر کہا کہ یہ ہے امریکی جمہوریت کا اصل چہرہ۔

مبصرین کا بھی کہنا ہے کہ چین کا اندیشہ درست ہے، امریکی صدارتی مباحثے کا مرکز چین ہو سکتا ہے۔ دونوں صدارتی امیدوار چین کو ایک خطرے کے طور پر دیکھتے ہیں اور اسی کو مرکز بنا کر عوام میں خوف پیدا کر کے انتخابات میں اتریں گے۔

دوست و احباب کو تجویز کریں

تبصرہ کریں