امریکی صدر ڈونلڈ ٹرمپ نے حزب اختلاف پر انتخابات میں دھاندلی کا الزام لگایا ہے۔ صدر کا کہنا ہے کہ وہ مقررہ وقت کے بعد ووٹوں کی گنتی رکوانے کے لیے سپریم کورٹ جائیں گے۔
صدر کے اعلان پر ڈیموکریٹ امیدوار جو بائیڈن نے کہا ہے کہ صدر کی کوشش امریکیوں سے جمہوری حق چھیننے کی کھلی کوشش ہے، تاریخ میں ایسا کبھی نہیں ہوا کہ کسی امریکی صدر نے شہریوں کی آواز دبانے کی کوشش کی ہو۔
دوسری طرف صدر ٹرمپ کا کہنا ہے کہ انکے لاکھوں ووٹروں کو ووٹ سے روکا گیا، اور ڈیموکریٹ نے ڈاک کے ذریعے ووٹ سے قوم کے ساتھ دھوکہ کیا ہے۔ ہم چاہتے ہیں کہ قانون پر اسکی روح کے مطابق عمل ہو، اور اس کے لیے ہم سپریم کورٹ جائیں گے۔
جو بائیڈن کی انتخابی مہم کے منتظم کا کہنا ہے کہ ووٹوں کی گنتی نہیں رکے گی یہاں تک کہ تمام ووٹ گن لیے جائیں اور جیتنے والے کا اعلان کر دیا جائے، اور یہی قانون ہے۔ اور اگر صدر ٹرمپ کی جانب سے ایسی کوشش کی گئی تو اسکی بھرپور مخالفت کی جائے گی۔
واشنگٹن سمیت 21 ریاستوں سے بذریعہ ڈاک آنے والے ووٹ 3 نومبر تک الیکشن کمیشن پہنچیں گے اور انکی گنتی اس کے بعد شروع کی جائے گی، یوں پنسلوینیا کے اہم 21 الیکٹورل ووٹوں کا فیصلہ 6 نومبر تک ممکن ہے۔
واضح رہے کہ صدر ٹرمپ پہلے سے ہی ڈیموکریٹ جماعت پر ڈاک کے ذریعے ووٹوں سے دھاندلی کا الزام لگا چکے ہیں، اور گزشتہ ہفتے انہوں نے میڈیا سے گفتگو میں کہا تھا کہ انہیں امید ہے عدالتیں 3 نومبر کے بعد ووٹوں کی گنتی کو قبول نہیں کریں گی۔