معروف امریکی سافٹ ویئر کمپنی مائیکروسافٹ کے مشترکہ بانی بل گیٹس اور انکی اہلیہ کے مابین طلاق ہو گئی ہے۔ 27 سال کے بعد علیحدگی کا اعلان بل گیٹس کی جانب سے ٹویٹر پر ایک پیغام کے ذریعے کیا گیا۔
مغربی میڈیا کے مطابق یہ دنیا کی مہنگی ترین علیحدگی میں سے ایک ہو سکتی ہے، جوڑا مشترکہ طور پر 127 ارب ڈالر کا مالک ہے۔
پینسٹھ سالہ بل گیٹس اور چھپن سالہ میلنڈا فرینچ نے مشترکہ طور پر علیحدگی کے اعلان کو گہرائی سے سوچ کر لیا فیصلہ قرار دیا ہے۔
یاد رہے کہ میلنڈا فرینچ بل گیٹس کی کمپنی میں ہی بطور مینیجر کام کرتی تھیں، جہاں دونوں نے ایک دوسرے کو پسند کیا اور 1994 میں شادی کرلی۔
جوڑے نے علیحدگی کے اعلان کے ساتھ ہی میلنڈا بل گیٹس کے خیراتی ادارے میں اکٹھے کام کو جاری رکھنے کا اعلان بھی کیا ہے۔
واضح رہے کہ بل گیٹس نے علیحدگی کے پیغام پر تبصروں کو بند رکھا اور ساتھ ہی ساتھ انکی نجی زندگی کو موضوع بحث بنانے سے پرہیز کی درخواست کی ہے۔
امریکی ارب پتی جوڑے کے تین بچے، جینیفر، راری اور فیئبی ہیں۔