امریکی انتخابات اور اسکے بعد کے حالات پر تبصرے کی ہوبہو عکاسی پر ڈیموکریٹ سینٹر برنی سینڈر کی ایک ویڈیو انٹرنیٹ پر خوب چل رہی ہے۔
یاد رہے کہ سینٹر برنی سینڈر خود بھی حالیہ انتخابات میں ڈیموکریٹ پارٹی کی طرف سے ایک امیدوار تھے تاہم انہوں نے جو بائیڈن کے حق میں پیچھے ہٹ گئے۔
ایک ٹی وی شو میں گفتگو کے دوران سینٹر کا کہنا تھا کہ انتخابات کے دن پہلے وہ ووٹ گنے جائیں گے جو پولنگ اسٹیشن پر ڈالے جائیں گے، اور کیونکہ ریپبلکن جماعت کے زیادہ تر ووٹر خود پولنگ اسٹیشن جا کر ووٹ ڈالیں گے، لہٰذا پہلے گنتی میں صدر ٹرمپ جیتتے ہوئے نظر آئیں گے، جس پر صدر ٹرمپ جیت کا اعلان کریں گے تاہم بعد میں ڈاک کے ذریعے آئے ووٹوں کی گنتی میں، جو کہ زیادہ تر ڈیموکریٹ کے ہوں گے میں جوبائیڈن کو برتری ملتی نظر آنے پر صدر ٹرمپ انتخابات پر اعتراضات اٹھانا شروع کر دیں گے۔ اور ایسا خصوصاً ان ریاستوں میں ہو گا جہاں دونوں حریفوں میں کانٹے دار مقابلہ متوقع ہے، جن میں پنسلوینیا، مشی گن اور وسکونسن نمایاں ہوں گی۔
سینٹر کی جانب سے بیان کیے گئے حالات کا ہوبہو ہونا دونوں حریفوں کی جانب سے بطور ثبوت استعمال کیا جا رہا ہے، انٹرنیٹ پر صدر ٹرمپ کے حامی امریکی صارفین کا کہنا ہے کہ سینٹر نے ڈیموکریٹ کے انتخابات کو چُرانے کی منصوبہ بندی کو عیاں کیا ہے، جبکہ ڈیموکریٹ جماعت کے حامیوں کا کہنا ہے کہ سینٹر نے اپنے تجربے کی بنیاد پر صدر ٹرمپ کے ممکنہ عمل کو بیان کیا۔
جبکہ کچھ صارفین سینٹر سینڈر کو وقت میں سفر کرنے والا بزرگ بھی کہہ رہے ہیں اور کچھ کا کہنا ہے کہ ایسا ذہین فطین بندہ ہمارا صدر کیوں نہ بنا۔