افغانستان کے شہر غزنی میں فوجی چھاؤنی پر خود کش حملے میں 30 فوجی ہلاک، 24 سے زائد زخمی ہو گئے ہیں۔
مقامی نشریاتی ادارے کے مطابق خود کش بمبار نے ہموی گاڑی میں بارود بھر رکھا تھا جسے اس نے چھاؤنی سے ٹکرا دیا۔
کسی بھی گروہ کی جانب سے تاحال حملے کی ذمہ داری قبول نہیں کی گئی ہے۔
آج دوسرا خود کش حملہ صوبہ زابل کے شہر قلات میں ہوا ہے، جس میں تین شہریوں کے جاں بحق ہونے اور 23 کے زخمی ہونے کی اطلاعات ہیں۔
زابل میں ہونے والے حملے کا ممکنہ نشانہ شہری کونسل کے سربراہ عطا جان حق بیان تھے، جو حادثے میں معمولی زخمی ہوئے ہیں۔
افغانستان میں ایک ہی روز میں دو بڑے اور اہم حملے چند ماہ کے وقفے سے دیکھنے میں آئے ہیں، خصوصاً امریکہ سے معاہدے کے بعد ان میں نمایاں کمی آئی تھی۔
دوسری طرف دوحہ میں اشرف غنی انتظامیہ اور طالبان میں افغان امن مذاکرات کا سلسلہ تاحال جاری ہے۔