فرانسیسی صدر ایمینیؤل میخرون نے کورونا وباء سے لڑنے کے لیے دنیا کو مشترکہ حکمت عملی بنانے پر زور دیا ہے۔ صدر میخرون کا کہنا تھا کہ ہمیں روس اور چین کی ویکسینوں کو بھی استعمال کرتے ہوئے فوری وباء سے جان چھڑانے پہ کام کرنا ہو گا ورنہ وائرس انتہائی تیزی سے خود کو بدل رہا اور حاضر ویکسین اس پر جلد بے اثر ہو جائے گی۔
یورپی ملک کے صدر کا مزید کہنا تھا کہ عالمی ادارہ صحت کی کووڈ-19 سے لڑنے کے لیے دنیا بھر میں مساوی سطح پر طبی آلات کی دستیابی کو یقینی بنانا ہو گا، تاکہ وباء سے نمٹنے میں آسانی ہو سکے۔
ریاستی نمائندگان کی کانفرنس سے خطاب میں صدر میخرون نے بار بار زور دیا کہ وباء سے لڑنے کے لیے مشترکہ عالمی حکمت عملی بنانا ہو گی، معاشی طور پر غریب ممالک کو بھی ویکسین کی فوری دستیابی کے بغیر وائرس کو ختم نہیں کیا جا سکے گا، وائرس تیزی سے جینیاتی تبدیلی کر رہا ہے اور پہلے سے بھی خطرناک قسم کے ساتھ حملہ آور ہو رہا ہے۔
صدر میخرون نے کورونا وائرس کے خلاف جدوجہد کو عالمی جنگ قرار دیا۔
کانفرنس سے خطاب میں لبرل صدر نے امریکی صدر جوبائیڈن کے عالمی ادارہ صحت میں واپسی کے فیصلے کو سراہا اور کہا کہ صدر ٹرمپ نے عالمی ادارہ صحت سے علیحدگی اختیار کر کے عالمی جدوجہد کو نقصان پہنچایا تھا۔
رواں ہفتے کے آغاز میں ہونے والی عالمی کانفرنس میں دنیا بھر سے ریاستی نمائندگان نے شرکت کی جن میں جرمنی کی چانسلر اینجیلا میرکل بھی شامل تھیں۔