معروف امریکی یو ٹیوب چینل ویریٹاس نے سی این این ڈائیریکٹر چارلی چیسٹر کی ویڈیو نشر کی ہے جس میں معروف ٹی وی چینل کے اعلیٰ عہدے دار سابق صدر ڈونلڈ ٹرمپ کے خلاف باقائدہ پراپیگنڈا مہم چلانے کا اعتراف کرتے دیکھے جا سکتے ہیں۔ ویڈیو میں چارلی بے باکی سے اعتراف کرتے ہیں کہ صدر ٹرمپ کو سرائے ابیض سے ہٹانے میں سی این این کا ہی کردار تھا۔
چارلی نے انکشاف کیا ہے کہ کیسے سی این این نے ٹرمپ کے بیمار ہونے کی مہم چلائی، اور جوبائیڈن کو تندرست اور توانا دکھایا۔ جس کا مقصد عام شہریوں کو یہ باور کروانا تھا کہ ٹرمپ صدارت کے لیے موضوع نہیں۔
چیسٹر کا کہنا ہے کہ ہم نے ڈاکٹروں کو سکرین پر دکھایا جو ٹرمپ کے بارے میں افواہیں پھیلانے میں ہماری مدد کرتے، اور حتیٰ کہ صدر کے بیمار ہونے کا ذمہ دار بھی انہی کو ٹھہراتے، جیسے کہ صدر کی ہاتھ ملانے کی عادت پر باقائدہ رپورٹیں بنائی گئیں، جن میں ڈاکٹر کئی منٹوں تک عوام میں صدر کی نفسیاتی صحت سے متعلق شبہات پیدا کرتے۔ ہم نے ایسی خبریں چلائی، جنہیں ہم خود پیدا کرتے اور پھر انکی خوب تشہیر کرتے، چیسٹر نے سی این این کی ایک خبر کا ذکر کرتے ہوئے کہا کہ دو دن تو برائن سٹیلٹر کی وہ خبر چلائی گئی جس میں صحافیوں کو ٹرمپ کی صحت سے متعلق خبر نکالنے پر ابھارا گیا۔
ویڈیو میں چیسٹر بتاتے ہیں کہ صدر ٹرمپ کے خلاف مہم کے برعکس جوبائیڈن سے متعلق خوب اچھی تشہیری مہم چلائی گئی، سی این این پر جوبائیڈن کو ہمیشہ دوڑ لگاتے، صحت کا خیال رکھتے، اور متحرک دکھایا گیا جس سے عوام میں انکی عمر اور صحت سے متعلق دھوکہ پیدا کیا گیا۔
چارلی چیسٹر کو ویڈیو میں واضح طور پر کہتے سنا جا سکتا ہے کہ؛ “دیکھو ہم نے کیا کیا، ہم (سی این این) نے ٹرمپ کو نکال باہر کیا، مجھے 100٪ یقین ہے کہ اگر سی این این یہ ساری مہم نہ چلاتا تو ٹرمپ کبھی بھی انتخابات نہ ہارتا، میں اسی لیے سی این این میں آیا کیونکہ میں اس سارے کھیل کا حصہ بننا چاہتا تھا۔
چیسٹر کا کہنا ہے کہ صحت سے متعلق بیانیہ مظبوط کرنے کے بعد ماحولیاتی مسئلے کو پکڑا گیا، اور صدر ٹرمپ کا نام لیے بغیر عوام میں ماحولیاتی مسائل پر آگاہی کی مہم شرو ع کردی گئی، ایسی ویڈیو نشر کی گئیں جن میں ماحولیاتی مسائل کو خوف کی علامت بنا دیا گیا، حتیٰ کہ معیشت کو بھی ماحولیاتی مسائل سے لاحق خطرات کا جھوٹ نشر کیا گیا۔ پگھلتی برف سے شہروں کو ڈوبتے اور امریکہ میں صحرائی گرمی کی ویڈیو نشر کی گئیں۔
چیسٹر نے انکشاف کیا کہ صدر ٹرمپ کے خلاف چلنے والی ساری مہم کی زمہ داری جیف زوکر کو دی گئی تھی۔
سی این این نے تاحال ان تمام انکشافات پر کوئی ردعمل نہیں دیا۔ البتہ ویڈیو کو صدر ٹرمپ کے حامیوں نے خوب اٹھایا ہے، انکا کہنا ہے کہ وہ پہلے ہی سی این این کے متعصب کردار سے واقف تھے، لیکن انکشافات سے عام عوام کو لبرل سیاست سے متعلق بہتر آگاہی حاصل ہو گی۔